Kryeministri i Serbisë, Ivica Dacic, ka paralajmëruar se bisedimet Beograd-Prishtinë do të vazhdojnë më 28 janar.

Siç raporton B92, ai ka thënë se për këtë është pajtuar edhe me Përfaqësuesen e Lartë të BE’së, Catherine Ashton.

“Ne jemi pajtuar edhe me Përfaqësuesen e Lartë të BE’së, Catherine Ashton, që dialogu të vazhdojë më 28 janar”.

“Vazhdimi i dialogut ka qenë kyç për zbatimin e Marrëveshjes së Brukselit. Duhet gjetur një zgjidhje për krijimin e qeverisjeve të reja në komunat me shumicë serbe në Kosovë”.

“Ne duhet të gjejmë një zgjidhje dhe jo të vetizolohemi”.

Duke komentuar refuzimin e Krstimir Pantic për t’u betuar në postin e Kryetarit të Komunës së Mitrovicës së Veriut, Dacic ka deklaruar se “ai ka qenë një veprim i tij personal”.

Kryeministri i Serbisë, po ashtu, raporton B92, ka shprehur shqetësim për këmbëngulësinë e Prishtinës për ta përmendur shtetësinë e saj në çdo moment.

“Problemi është se disa çështje periferike po bëhen çështje kryesore politike dhe Prishtina po pretendon që në çdo rast të pohojë shtetësinë e saj”.

Dacic ka shtuar se Qeveria e Serbisë nuk do të pranojë asnjë marrëveshje që bie ndesh me neutralitetin e statusit.

“Është e rëndësishme që Qeveria e Serbisë ka një politikë të unifikuar dhe në asnjë moment nuk do të pranojë shantazhe lidhur me çështjen e statusit”.