Mbyllet “Kafeneja Jonë”

13:51 | 29 Nentor 2013

Kafeneja Jone

Bekimi dhe Muharremi, dy rolet e serialit “Kafeneja Jonë” kanë konfirmuar përfundimin e xhirimeve të serialit që do të emetohet për herë të fundit në RTK më 9 dhjetor. Kjo i ka zhgënjyer adhuruesit.

Më në fund, Bekimi u lodh…

E hëna e 9 dhjetorit do të jetë dita e fundit kur seriali i popullarizuar kosovar “Kafeneja Jonë” do të shfaqet në RTK.

Dy protagonistët e këtij seriali, që për një dekadë ka argëtuar shikuesit kosovarë, kanë konfirmuar përfundimin e tij, edhe pse nuk kanë dhënë arsyet për këtë.

Astrit Kabashi, që luan rolin e Bekimit në këtë serial, ka shkruar në profilin e tij në Facebook, lajmin e keq për adhuruesit e këtij seriali.

“Merr fund Transmetimi i Kafeneja Jonë ne RTK! Episodi i fundit më 9 Dhjetor”, ka shkruar Astrit Kabashi.

Protagonisti tjetër i serialit, Naser Rafuna, që luan rolin e Muharremit, gjithashtu ka konfirmuar mbylljen e “kafenesë”.

“Përfundoi seriali “Kafeneja Jone” . Më 9 dhjetor emetohet episodi 336 ne RTK, pra episodi i fundit. Ju falënderojmë që na keni përcjellë dhe pëlqyer, të gjithë ju miq të dashur. Thanks nga ekipi ynë”, ka shkruar Naser Rafuna.

Postimet e tyre kanë ngjallur reagime të shumta nga “friends”-at në Facebook.