Chelsea ka pranuar një ofertë prej 37 milionë funtesh nga rivali Manchester United, për mesfushorin spanjoll Juan Mata.

25-vjeçari do t’i nënshtrohet testeve mjekësore të enjten para kompletimit të kalimit tek kampioni i Premierligës. Mata pritet të nënshkruajë kontratë për katër vjet e gjysmë në Old Trafford.

Reprezentuesi spanjoll është përshëndetur me bashkëlojtarët dhe stafin në qendrën stërvitore të Chelseas në Cobham të mërkurën.

Menaxheri David Moyes ka refuzuar të komentojë ardhmen e mundshme të ish yllit të Valencias, por besohet se marrëveshja është shumë pranë zyrtarizimit.

Nëse Mata kalon në Old Trafford, atëherë transferimi i tij do të jetë rekord i blerjes nga United duke tejkaluar 30.75 milionë funtet e paguara për angazhimin e sulmuesit Dimitar Berbatov nga Tottenham në shtator 2008.