Real Madridi mund të mbetet pa asgjë në fund të sezonit në La Liga. Dy humbjet brenda tri ditësh, fillimisht nga Barcelona e më pas nga Sevilla, bënë që gjiganti madrilen, nga favoriti absolut, të konsiderohet si i humbur në kampionatin spanjoll.

Mediat e kanë kritikuar ashpër paraqitjen e ‘Los Blancos’, por futbollistët e klubit spanjoll i janë gjuajtur në qafë uellsianit gareth Bale, të cilin e akuzojnë më së shumti për titullin pothuajse të humbur të kampionit.

Futbollisti më i shtrenjtë në botë e ‘ndihmoi’ Sevillën të fitonte 2:1 në mesjavë pasi në një moment u largua nga fusha për t’i ndërruar këpucët e futbollit.

Ky dukej të ishte momenti kyç i ndeshjes, sepse në atë moment Ivan Rakitic harkoi për Carlos Bacca, i cili ia siguroi fitoren ekipit të tij.

Mediat spanjolle kanë zbuluar se në dhomat e zhveshjes pas lojës, ka pasur fyerje në drejtim të ish futbollistit të Tottenhamit nga ana e bashkëlojtarëve.

“Je një arrogant i m… Më mirë e ke ta mbash gojën e mbyllur”, ka thënë Pepe, siç raporton e përditshmja spanjolle, Sport.

“Qerrata, na humbe titullin për të cilin dhamë gjak në shtatë muajt e fundit. Nuk arrij të të shikoj më”, ka ofenduar Di Maria.

Bale e ka shkatërruar mundësinë që ta evitonte humbjen e Realit. Në minutat shtesë, uellsiani ia ‘vodhi’ një gjuajtje të lirë Ronaldos, i cili u irritua dhe e kritikoi në mesin e fushës.