Fatmir Limaj ka përshëndetur vendimin e Trupit Gjykues për rastin “Kleçka”, me të cilin ai u lirua përfundimisht nga të gjitha akuzat për krime lufte.

Pas daljes nga salla, Limaj, i shoqëruar nga duartrokitje të mëdha të qytetarëve, shprehu një mirënjohje të veçantë për Trupin Gjykues, i cili, sipas tij, vendosi mbi bazën e provave dhe fakteve.

Një falënderim ka pasur edhe për gjithë qytetarët e Kosovës që kanë besuar çdo herë në pafajësinë e tij.

“Më lejoni së pari t’ju shpreh falënderim të gjithë atyre qytetarëve që kanë pasur besim në fjalët tona, në luftën tonë, në drejtësinë tonë dhe në atë që kemi thënë”.

“Pas një procesi të gjatë dhe shterrues, Trupi Gjykues, të cilit i shpreh mirënjohje, mbi bazën e provave dhe fakteve mori këtë verdikti për të më shpallur mua dhe të gjithë bashkëluftëtarët të pafajshëm”.

“Unë nuk kam çfarë të them tash. Lexoni ato çfarë kam thënë para tre vjetësh. Sot, Gjykata vërtetoi ato që kam thënë atëherë.”

Gjykata vendosi për lirimin e Fatmir Limajt dhe bashkëluftëtarëve të tij, duke i shpallur ata të pafajshëm për veprat që u ngarkoheshin lidhur me Rastin “Kleçka”.

Kjo është hera e dytë që Limaj shpallet i pafajshëm për këtë rast, në të cilin dëshmitari kryesor ishte Agim Zogaj, i njohur ndryshe si “Dëshmitari X”.

Kështu, Prokurori Maurizio Salustro ka dështuar edhe në tentimin e tij të dytë për ta dënuar Limajn.

(Video: lajmi.net)