LDK organizon edhe një Kuvend tjetër
Kryetari i Lidhjes Demokratike të Kosovës Isa Mustafa, i cili u rizgjodh në krye të LDK-së edhe për katër vitet e ardhshme ka paralajmëruar mbajtjen e Konventës së dytë të partisë.
Lajme
Në këtë Konventë që do të jetë Kuvend punes, Isa Mustafa përmes një publikimi në Facebook, ka bërë të ditur se do të caktohen orientimet programore të LDK-së për katër vitet e ardhshme, si parti e qendrës së djathtë e cila po e udhëheq qeverinë për herë të parë pas lufte.
Ai ka paralajmëruar disa ndryshime edhe për degët e partisë në diasporë, të cilat i shkaktuan probleme në Kuvendin e VIII-të zgjedhor të partisë.
Publikimi i plotë i Isa Mustafës:
Pas përmbylljes së procesit zgjedhor, LDK do të organizoj Konventën e Dytë të saj (Kuvendin punues), për orientimet programore për katër vitet e ardhshme, si parti e qendrës së djathtë e cila ka marrë përgjegjësinë, për herë të parë pas lufte, të drejtojë qeverisjen e vendit.
Në këtë Konventë, po ashtu, do të propozohen disa ndryshime dhe plotësime të Statutit të LDK-së që ndërlidhen me organizimin e degëve jashtë vendit dhe me moshën e Forumit Rinor të LDK-së. Kurse, delegatëve të Kuvendit, do tu prezantohet raporti i punës së LDK-së për katër vitet e kaluara dhe raporti financiar si dhe do të informohen lidhur me punën e grupit parlamentar të LDK-së në Kuvendin e Republikës së Kosovës.
Në fazën përgatitore të kësaj Konvente, do të zhvillohet debat me anëtarësinë dhe organet e LDK-së në terren, ku në mënyrë të drejtpërdrejtë do të japin kontributin e tyre në këto procese. IM