Aleanca për Ardhmërinë e Kosovës për zgjedhjet e ardhshme lokale duhet të gjejë një kandidat të ri për Komunën e Prishtinës.

Besnik Tahiri ka vendosur që të mos garojë më në Kryeqytet, pas humbjeve që ai përjetoi në dy palë zgjedhje lokale.

Hera e tretë, për të, nuk do të ekzistojë.

Tahiri ka thënës e arsyeja që nuk do të kandidojë më është se ai kishte prezantuar programin e tij, por  qytetarët nuk e kanë përqafuar atë, andaj ai pranon vullnetin e qytetarëve.

“Nuk do të kandidoj më, jo për shkak të egos apo ndonjë elementi tjetër, por për shkak se nuk ka se çka t’i ofroj më Prishtinës, krejt çka kisha i kam dhënë.”

“Unë gjatë 10 muajve, së bashku me ekipin tim, kam qenë i përkushtuar që të ofroj maksimumin për të dhënë një ofertë programore dhe cilësore, e cila është profesionale dhe për synim ka pasur ndryshimin në Prishtinë”.

“Kjo ofertë nuk është përqafuar nga qytetarët. Por, i përgëzoj dhe falënderoj qytetarët për dalje masive në zgjedhje, sepse zgjedhjet janë verdikti i vendit dhe të gjithë i nënshtrohemi”.

“Nuk jemi të zhgënjyer me faktin se a kemi punuar apo jo, por nuk kam më shumë se çka t’i jap këtij qyteti përveç ofertës që e kam pasur, vendimi është i tyre dhe këtë e pranojmë”.

“Oferta që unë e kam prezantuar nuk është përkrahur dhe si rrjedhojë ajo ka rënë. Qytetari i Prishtinës do të vendosë se kush do të fitojë në Kryeqytet”.

Për Besnik Tahirin është hera e dytë që po kandidon nga radhët e AAK’së për të parin e Prishtinës. Gjithsesi ai tha se ndihet krenar për atë se çka u ofroi qytetarëve.

“Nuk kthehemi më mbrapa, por ne do të bëjmë një vlerësim mbi rezultatet dhe mbi atë që ka ndodhur”.

“Unë edhe ekipi im jemi krenar me atë që i kemi ofruar këtij qyteti, por nuk jemi të kënaqur me rezultatet, e për këtë do të bëjmë vlerësim”.