Ky është ekipi i Hashim Thaçit

Zëvendëskryeministri dhe ministri i Jashtëm, Hashim Thaçi, e ka kompletuar ekipin e tij të ri të punës. Ai ka emëruar këshilltarët e tij dhe përmes një njoftimi zyrtar janë informuar personeli dhe ambasadat e Kosovës, përfaqësitë diplomatike dhe të gjitha organizatat ndërkombëtare të akredituara në Kosovë.

Lajme

20/01/2015 15:53

Nga burime brenda njërës prej ambasadave të Kosovës në rajon, KosovaPress mëson se shef të kabinetit, zëvendëskryeministri dhe ministri i Jashtëm, Hashim Thaçi, e ka emëruar përsëri Abelard Tahirin, ish-shefin e deritashëm të stafit të tij. E pos Tahirit, ai i ka riemëruar si këshilltarë edhe shumicën e këshilltarëve nga mandati i kaluar. 

Postin e këshilltarit për marrëdhënie bilaterale, Thaçi ia ka besuar ish-aktivistit të shoqërisë civile, Ardian Arifajt.

Organizatat ndërkombëtare dhe diplomacinë ekonomike ia ka besuar ish-këshilltarit të Sali Berishës dhe njohësit të proceseve politike rajonale, Adri Nurellarit, që ishte këshilltar i tij edhe në mandatin e kaluar. Ndërsa, për protokollin e Thaçit, do të vazhdoj të përkujdeset ai që është përkujdesur gjatë gjithë këtyre viteve, Edi Sejdiu. Gjithashtu, postin e këshilltarit të Thaçit e ka trashëguar edhe Ismail Syla, i cili i ka shërbyer atij edhe në të kaluarën.

Por, përpos këshilltarëve nga mandati i kaluar, Thaçi ekipin e tij e ka rifreskuar edhe me këshilltarë të ish-ministrave të tij.

Për të mbuluar punën me media, këshilltar e ka emëruar Adil Behramajn, i cili ishte këshilltar dhe zëdhënës për media edhe i ministrit të Bujqësisë në mandatin e kaluar.

Kurse, Pëllumb Kallabën dhe Muhamet Brajshorin, ish-këshilltarët e Enver Hoxhajt, i ka riemëruar dhe angazhuar përsëri në Ministrinë e Punëve të Jashtme. Njërin si këshilltar për marrëdhëniet me NATO’n e organizatat e sigurisë dhe tjetrin për njohjet e shteteve.

E për ta ndihmuar me këshilla ligjore, e cila është njëra prej fushave më të ndjeshme, Thaçi për këshilltar ligjor ka zgjedhur Robert Muharremin.

Kosovapress mëson se nga ky ekip, i cili do ta mbështes Thaçin edhe në punën e zëvendëskryeministrit të parë në Qeveri, por edhe në atë të ministrit të Jashtëm, gjashtë prej këshilltarëve të tij janë politik.