Kryeministri i Kosovës, Albin Kurti, është duke qëndruar për një vizitë zyrtare në Mbretërinë e Bashkuar. Në një ligjeratë të mbajtur sot, Kurti ka thënë se kërcënimi për luftë të re në rajonin e Ballkanit është real.

Kurti ka thënë se Serbia çdo ditë e më shumë po krijon lidhje më të ngushta me Rusinë dhe Kinën, dhe në një kohë kur po ndodh një luftë në Evropë, s’mund të injorohet kërcënimi për një luftë tjetër në rajon.

Kurti para të pranishmëve në konferencën e mbajtur në King’s College në Londër, ka thënë se rreshtimi i Serbisë me Rusinë shfaq një qasje destruktive ndaj Republikës së Kosovës dhe se “armatosja e shpejtë dhe e madhe” janë tregues se Serbia synon përshkallëzimin me qëllim të realizimit të ambicieve të saj territoriale.

“Kërcënimi nuk është thjesht teorik, rreziku i një lufte të re është real”, ka thënë Kurti.

“Ne duam të anëtarësohemi në NATO sa më shpejt të jetë e mundur. … ne duhet të punojmë së bashku që Kosova të anëtarësohet në NATO në këtë dekadë dhe të kontribuojmë për sigurinë dhe të përfitojmë gjithashtu”, ka potencuar kreu i Qeverisë së Kosovës.