Kurti duke folur për dialogun me Serbinë, tha se ai do  të bëhet mbi parimin reciprocitetit dhe respektimit të ndërsjellë të sovranitetit. Ai ka ritheksuar se Marrëveshja e 19 prillit të vitit 2013 e nënshkruar nga kryeministrat e Kosovës dhe Serbisë do të dërgohet në Komisionin e Venedikut.

“Dialogun e deritanishëm do ta hetojmë e hulumtojmë me Komision Hetimor Parlamentar. 40 takime Thaçi-Daçiç. Nuk i kemi as transkriptet as procesverbalet. Andaj, dialogu duhet t’i nënshtrohet një hetimi, dhe gjithashtu do t’i përdorim mekanizmat për ta vlerësuar kushtetutshmërinë e marrëveshjeve të arritura, duke shfrytëzuar edhe Komisionin e Venedikut”, duke shtuar se PDK i bëri koncesione pafund Serbisë, bëri korrupsion pafund në Kosovë, dhe shkatërroi institucionet dhe shoqërinë në përgjithësi.

“Në pikën e pestë, të marrëveshjes së 10 shtatorit, themi që angazhohemi për dialog parimor, cilësor, të përgatitur mirë e të udhëhequr nga Lëvizja VETËVENDOSJE!. Përveç kësaj ky dialog parimor duhet të jetë i tillë që e përfshinë parimin e reciprocitetit dhe të respektimit të ndërsjellë të sovranitetit dhe integritetit territorial”. 

Kryetari Albin Kurti duke iu drejtuar të pranishmëve, foli për dëmet që ia ka shkaktuar qeverisja e PDK-së Kosovës, për kapjen që ia ka bërë shtetit kjo parti, gjë që dëshmohet edhe me insistimin e Enver Hasanit, Flora Brovinës dhe Atifete Jahjagës në të drejtën e paqenë të PDK-së për ta mbajtur Kryeparlamentarin, si dhe për marrëveshjen e arritur më 10 shtator në mes VETËVENDOSJE!-s, LDK-së, AAK-së dhe NISMA-s.

Lidhur me marrëveshjen e 10 shtatorit, ai tha se ajo përqendrohet në çështjet e zhvillimit ekonomik, tek rritja e punësimit dhe mirëqenies së qytetarëve, tek reformat substanciale në arsim dhe shëndetësi, në forcimin e shtetit ligjor dhe luftën kundër krimit të organizuar dhe korrupsionit, për reformat institucionale dhe demokratike; në dialog të ri me Bashkimin Evropian për anëtarësimin e Kosovës edhe në NATO edhe në BE, në dialog të hapur me pakicën serbe ku i trajtojmë ata si qytetarë të Republikës në kuadër të zhvillimit për hir të zhvillimit.

Ndërsa në interesimin e të pranishëmve në këtë takim lidhur me raportin në mes të VETËVENDOSJE!-s dhe LAN-it, Kurti tha se shumica parlamentare nuk është e përsosur aspak në të mirën e saj, mirëpo e dimë që kjo shumicë parlamentare është për kundruall PDK-së, e cila është gati e përsosur në të keqen e saj.

Pasi akuzoi për krime dhe skandale që PDK sipas tij i ka bërë gjatë qeverisjes, Kurti tha se këta njerëz nuk e kanë vendin në pushtet, por në burg.

“Mirëpo, pikërisht këta e kanë kapur shtetin, në mënyrë që gjyqësia, prokuroria, policia, Presidentja, Gjykata Kushtetuese, të mos jenë në shërbim të qytetarëve por në shërbim të kësaj partie shtet e cila e kupton se është në liri vetëm kur është në pushtet. Posa ta humbin pushtetin, këta e dinë që e humbin edhe lirinë”, u shpreh Kurti.