Serbia ka pasur pretendime territoriale ndaj Kosovës, mirëpo përpjekjet e saj kanë qenë të pasuksesshme.

Kështu ka deklaruar Kryeministri i Kosovës, Hashim Thaçi, në një intervistë për televizionin boshnjak BHT1.

Ai ka thënë se tani ekziston Marrëveshja e 19 prillit me Serbinë dhe se Kosova është sovrane dhe e pavarur, me integritet territorial të pranuar ndërkombëtarisht.

“Askush nuk mund të aspirojë për të ndryshuar kufijtë e rajonit”, ka thënë Kryeministri Hashim Thaçi.

Ai është pyetur nëse Serbia do të jetë e gatshme të pranojë pavarësinë e Kosovës.

“Tash për tash, është e rëndësishme të punohet në normalizimin e marrëdhënieve, ndërsa do t’i vijë koha edhe njohjes.”

“Tani duhet të mendojmë më shumë për të ardhmen sesa për të penguar njëri-tjetrin”.

Kryeministri Thaçi, po ashtu, ka deklaruar se bisedimet në Bruksel i kanë ndihmuar shumë edhe Kosovës, edhe Serbisë, si dhe paqes dhe stabilitetit në rajon.