Kryetari i Partisë Demokratike të Kosovës, Memli Krasniqi, ka pritur në takim deputetin kanadez Kyle Seeback dhe bashkëshorten e tij Fluturën.

Kyle Seeback është anëtar i Grupit të Miqësisë me Kosovën, si dhe Ministër në Hije për Tregti Ndërkombëtare.

Të dy diskutuan për raportet dhe fuqizimin mes dy vendeve. Ndërsa Krasniqi në fund i falënderoi Kyle dhe Fluturën për vizitën.

“Në selinë e PDK-së, kisha kënaqësinë që të pres dy mysafirë të veçantë – deputetin kanadez, që tashmë është bërë edhe dhëndërr i Kosovës, Kyle Seeback, si dhe bashkëshorten e tij, Fluturën.

Me Kyle, i cili është anëtar i Grupit të Miqësisë me Kosovën, si dhe Ministër në Hije për Tregti Ndërkombëtare, diskutuam për raportet mes dy shteteve tona dhe mundësitë e fuqizimit të këtyre raporteve. Kanada në përgjithësi, e Kyle në veçanti, janë krah i rëndësishëm i mbështetjes ndaj shtetit dhe popullit tonë.

Faleminderit për vizitën, Kyle dhe Flutura!” /Lajmi.net/