Komisioni Qendror i Zgjedhjeve (KQZ) ka mbajtur konferencën e tretë dhe të fundit për procesin e votimit në përfaqësitë diplomatike të Republikës së Kosovës, duke njoftuar se procesi është zhvilluar pa pengesa dhe në mënyrë të rregullt.

Sipas KQZ-së, deri në orën 20:00 është përmbyllur votimi në 26 nga gjithsej 30 përfaqësi diplomatike, ndërsa në 4 të tjera në Shtetet e Bashkuara dhe Kanada pritet të përfundojë në orën 01:00 të ditës së diel, sipas kohës lokale në Kosovë, transmeton lajmi.net.

Institucioni ka bërë të ditur se gjatë gjithë ditës ka qenë në kontakt të vazhdueshëm me misionet diplomatike, duke vlerësuar se procesi është zhvilluar pa ndonjë pengesë.

KQZ ka falënderuar stafin e misioneve diplomatike dhe anëtarët e këshillave të vendvotimeve për angazhimin e tyre në organizimin e votimit.

Sipas të dhënave, nga 27,724 votues të regjistruar, kanë votuar 22,414 qytetarë, ose 80.85 për qind.

Fletëvotimet e diasporës nuk do të numërohen në përfaqësitë diplomatike, por do të transportohen në Kosovë, ku do të bëhet numërimi i tyre në ditët në vijim.