Koci: Taksa prej 100 për qind mund të sjellë reciprocitet nga Serbia

Avokati, Arianit Koci, po cilëson se masa ndaj Serbisë do ta forcojë shtetin e Kosovës.

Lajme

24/11/2018 16:28

Përmes një postimi në Facebook, Koci ka thënë se populli i Kosovës do ta vuajë shtrenjtimin eventual të mallrave bazike, dhe se aplikimi i këtyr masave mund të sjellë edhe reciprocitet nga Serbia, raporton lajmi.net.

Megjithatë, sipas tij Kosova duhet të vazhdojë t’i ndjekë aspiratat e veta.

Ky është postimi i plotë i Kocit në Facebook:

Taksa forcon shtetin, tarifën e paguan qytetari

Aplikimi i taksës në produkte serbe na qenka veprim popullist dhe i pamatur, e reaksioni i Serbisë nuk qenka i tillë?

Të gjithë jemi të vetëdijshëm që në fund populli do ta paguajë shtrenjtimin eventual të mallrave bazike, dhe se aplikimi i taksave ad-hoc, mund të sjellë edhe masa reciproke të Serbisë.

Disa po thonë që veprimi i qeverisë sonë është iracional dhe i pamatur mirë.

Në anën tjetër rreth 15.000 persona kanë vdekur për lirinë e Kosovës.
Rreth 20.000 gra janë dhunuar.
Me qindra mijëra kosovarë janë persekutuar dhe burgosur.
Mos të flasim për dëme ekonomike.
A mos paska qenë më racionale me e pasë ulur kokën prej vitit 1912, e mos me i rezistu armikut dukshëm më të fortë?

Duhet të vazhdojmë t’i ndjekim aspiratat tona – me çdo kusht e sakrificë, deri në realizimin e ëndrrës sonë shekullore: pavarësisë së plotë të Kosovës.

Ramush Haradinaj bashkë me gjithë ministrat dhe njerëzit e tjerë duhet t’ua shpjegojnë qytetarëve se taksën e kanë vendosur për të mirën e Shtetit. Njëkohësisht, t’ju tregojnë se ata, pra qytetarët, njerëzit e këtij vendi do ta paguajnë edhe këtë vendim të mirë për shtetin. Në fund të fundit fajin pse jemi në këtë gjendje ku kemi ardhur e kanë secili udhëheqës i Kosovës. Edhe Haradinaj tash, sikurse Thaçi dje dhe Isa Mustafa pardje. /Lajmi.net/