KMDLNJ kërkon krijimin e një fond për ata që pësojnë në vendet e punës

Këshilli për Mbrojtjen, të Drejtat dhe Liritë e Njeriut (KMDLNJ), ka kërkuar krijimin e një fondi për personat që pësojnë në vendet e punës.

Lajme

23/04/2019 12:34

Këshilli për Mbrojtjen, të Drejtat dhe Liritë e Njeriut, ka reaguar pas rastit tragjik që ndodhi dje në Mitrovicë, ku një 27-vjeçar humbi jetën pas shembjes së një pjesë të ish hotelit ‘Adriatik’ i cili ishte duke u rinovuar.

Përmes një reagimi, KMDLNJ përmend edhe shembjen e një objekti të banimit që ishte duke u ndërtuar në Fushë Kosovë, rast i cili ndodhi dje.

KMDLNJ thotë se në Kosovë, punëtorëve nuk u sigurohen as kushtet për punë dhe se nuk kanë kontrata pune e as sigurime shëndetësore, shkruan lajmi.net.

“Realisht , sot në Kosovë nuk paraqet lajm nëse ndonjë punëtor lëndohet, bëhet i paaftë përjetësisht për punë apo edhe e humb jetën për faktin se punëdhënësi nuk siguron kushte për punë për të punësuarit , nuk kanë kontrata pune , nuk kanë sigurime shëndetësore e mos të flasim për sigurime të jetës . Në  99 % të tasteve e pësojnë punëtorët në 1 % të rasteve dënohen simbolikisht punëdhënësit për të vazhduar “ vallen e vdekjes “ të atyre që për shkak të kushteve të rënda ekonomike detyrohen që të punojnë në kushte skajshmërisht të rrezikshme për jetën, pa pasur fare siguri dhe pa u kompensuar familjet për humbje të jetës”, thuhet mes tjerash në reagim.

KMDLNJ tutje thekson se, Kosova në përgjithësi kurse Prishtina në veçanti janë shndërruar në kantiere ndërtimi ku punohet pa orar, në ditë feste, ditë pushimi, në kushte të rënda atmosferike dhe madje punohet edhe gjatë natës pa pasur aspak konsideratë për sigurinë dhe qetësinë e qytetarëve .

KMDLNJ ndër tjerash ka njoftuar se për këtë arsye është takuar me Inspektoratin e Punës të Kosovës për të gjetur një mënyrë të dilet nga kjo gjendje e cila, dita – ditës po bëhet më e vështirë dhe më e papërballueshme .

KMDLNJ ka kërkuar heqjen e licencës së punës për punëdhënësit që nuk sigurojnë kushte për punë me ç’rast rrezikohet jeta e të punësuarve.

Gjithashtu, KMDLNJ ka kërkuar që dënimet në të holla të jenë shumë më të larta dhe nga ato mjete të grumbulluara të krijohet një Fond për ata që e pësojnë dhe familjet e tyre.

“Për një punëdhënës që qarkullon dhjetëra milionë euro në fushën e ndërtimtarisë , dënimi prej 5 apo 10,000 euro është dënim për kafe prandaj edhe ka përsëritje të rasteve. Është e pabesueshme që edhe pas të gjitha jetëve të humbura për shkak të kushteve të punës , askush të mos ketë përgjegjësi para ligjit. Shteti duhet të gjejë një mënyrë që familjet që e humbin anëtarin e familjes duhet të kompensohen dhe ta kenë një pension , jo më të vogël se paga e një të punësuari në ndërtimtari. Ose duhet të ashpërsojë gjobat në rast të humbjes së jetëve apo lëndimeve , ose duhet të rrisë taksat për leje ndërtimi e që një pjesë do të derdheshin në Fondin e viktimave të ndërtimtarisë por edhe në vendet e tjera të punës e ku përgjegjësia është e punëdhënësit”, ka theksuar KMDLNJ. /Lajmi.net/