Ministri Bajrami ka thënë se Ministria e Arsimit është e angazhuar në ndërtimin e standardit të cilësisë prej nivelit parashkollor e deri në atë universitar.

Duke folur për rëndësinë e përfshirjes së Kosovës në Programin Ndërkombëtar për Vlerësimin e Nxënësve PISA 2015, ministri Bajrami vlerësoi se, ky test ndërkombëtar do të jetë një shans i mirë për mbledhjen e informacioneve, mbi pasqyrimin e mësimnxënies në këtë fazë të shkollimit dhe ndryshimet e mundshme të politikave arsimore.

“Ky test ndërkombëtar ka për qëllim të vlerësojë shkallën e përvetësimit të kurrikulës shkollore nga ana e nxënësve, andaj ju ftoj që të angazhoheni seriozisht në këtë vlerësim të rëndësishëm, sa i përket mbledhjes së të dhënave mbi njohuritë e nxënësve 15-vjeçar në tri komponentë kryesorë: aftësitë në të lexuar, në matematikë dhe në shkenca tjera natyrore”, ka theksuar ministri Bajrami.

Në vlerësimin PISA 2015, i cili organizohet nga data 15-25 prill 2015, do të përfshihen 225 shkolla dhe mbi 5 mijë nxënës të moshës 15-vjeçare.

Ministri ka shprehur qëndrimin se nuk do të ulet kriteri i kalueshmërisë për Provimin e Maturës Shtetërore, dhe se është duke u bërë reformimi për këtë provim.

Ai, ndër të tjera, ka folur edhe për zbatimin e Kontratës Kolektive, marrëveshjet e nënshkruara me Ministrinë e Arsimit të Shqipërisë, përgatitjen dhe trajnimin e mësimdhënësve dhe decentralizimin e buxhetit të shkollave.

Në takimin e sotëm, përfaqësues të GIZ-it kanë prezantuar botimin e dytë të doracakut për “Qeverisjen e arsimit në komuna”, projekt i Ministrisë Arsimit i realizuar me mbështetjen e organizatës gjermane./KosovaPress/