Ajo ka shtuar se Kosova ka ende shumë rrugë për të bërë deri në një treg të lirë e të integruar në tregun e BE’së.

“Kosova, si edhe vendet e rajonit, ka ende për të mësuar për tregjet e energjisë elektrike e ende shumë rrugë për të bërë deri në një treg të lirë e të integruar në tregun e Bashkimit Evropian (që parashihet më 2030). Bizneset tona gjithashtu kanë shumë për të mësuar në drejtim të operimit në treg të lirë e optimizimit të konsumit të energjisë elektrike. Këto mësime mund të duken të vështira tani, por ato duhet të mësohen sot në mënyrë që bizneset tona të jenë konkurruese në të ardhmen kur të jemi pjesë e tregut evropian të integruar të energjisë, me të gjitha mundësitë por edhe sfidat e veta me politika si ajo e çmimit të karbonit.”

Ajo ka thënë se Qeveria do të jetë e sinqertë dhe e përkushtruar.

“Në këtë rrugëtim, sigurisht që do të ketë sfida edhe për bizneset edhe për institucionet. Ndoshta edhe do të bëjmë ndonjë gabim ndonjëherë, por kjo është mënyra se si mësojmë e si rritemi për t’u bërë konkurrues në treg e për të neutralizuar ndikimin e atyre që nuk janë as miqt tonë e as të ndershëm në biznes. Nga ana e Qeverisë së Republikës së Kosovës, ju sigurojmë që në këtë rrugëtim do të jemi të sinqertë, të përkushtuar e së bashku për interesin publik: për të mirën e konsumatorit, sektorit e vendit”, ka shtuar ajo mes tjerash.

Nga dje (1 qershor), kompanitë me më shumë se 50 punëtorë apo mbi 1 milion euro fitim, kanë hyrë në treg të lirë të energjisë.

Ky vendim i marrë nga Zyra e Rregullatorit të Energjisë, nuk është pritur mirë nga përfaqësuesit e bizneseve, pasi çmimi që ata do të paguajnë nga dje e tutje për energjinë, do të jetë shumëfish më i lartë se ai që kanë paguar.

Të enjten, bizneset kanë protestuar në Prishtinë, duke mbyllur disa nga hyrjet kryesore të kryeqytetit, duke kundërshtuar vendimin për treg të lirë të energjisë.

Oda Ekonomike e Kosovës ka kërkuar nga Qeveria dhe ZRrE, pezullimin e vendimit për treg të lirë për 1 vit, në mënyrë që kompanitë të marrin masat e nevojshme dhe të përgatiten për këtë ndryshim.

Kjo nuk është mirëpritur nga Qeveria e Kosovës, pasi siç ka thënë kryeministri në detyrë i Kosovës, Albin Kurti në mbledhjen e Qeverisë, nëse ky vendim do të pezullohet, çmim më të lartë do të paguajnë qytetarët dhe bizneset e vogla.

Ai ka thënë se këto biznese që hyjnë në treg të lirë, janë vetëm 1% i bizneseve në Kosovë.

Në përfundim të muajit qershor, pritet të dihet ndikimi i këtij vendimi në ekonomitë e bizneseve të mëdha. /Lajmi.net/