Ministri i Jashtëm i Kosovës, Enver Hoxhaj, ka zhvilluar një bisedë telefonike me Ministrin e Shtetit për Punë të Jashtme të Katarit, Khalid Bin Mohammad Al Attiyah.

Në një komunikatë të lëshuar nga Ministria e Jashtëm, thuhet se në këtë bisedë ministrat e jashtëm të dy shteteve kanë biseduar për fuqizimin e marrëdhënieve bilaterale ndërmjet Kosovës dhe Katarit.

Hoxhaj ka vlerësuar lart përkrahjen që ky shtet ka dhënë për Kosovën, pas njohjes së pavarësisë.

“Hoxhaj gjatë bisedës e ka njoftuar homologun nga Katari edhe për konsolidimin e shtetësisë së Kosovës dhe për forcimin e pozitës ndërkombëtare, përmes njohjes universale të saj”, thuhet në këtë komunikatë.

Ministri i Shtetit i ka rikonfirmuar Ministrit Hoxhaj mbështetjen e Katarit për fuqizimin e shtetësisë dhe subjektivitetit ndërkombëtar të Republikës së Kosovës.