Kanye West ka shprehur mbështetje për Sean Diddy Combs, i cili është në gjyq në gjykatën federale të Manhattanit.

Akuzat kundër Diddy-t përfshijnë formimin e një organizate kriminale, trafikimin dhe transportimin për qëllime prostitucioni, si dhe dhjetëra akuza për përdhunim dhe sulm seksual. Nëse Diddy dënohet, ai mund të përballet me burgim të përjetshëm.

Kamera kapën mbërritjen e West në gjykatë, teksa ai doli nga një makinë e zezë, i veshur me rroba të bardha. Ai u takua me disa persona jashtë ndërtesës dhe shkëmbeu një përshëndetje miqësore me Christian Combs, djalin e Diddy-t.

Pas kësaj, ai kaloi nëpër kontrollin e sigurisë, duke iu përmbajtur procedurave të zakonshme të gjykatës federale.

Një video e postuar nga TMZ tregon reperin 48-vjeçar duke kaluar pa asnjë trajtim preferencial dhe duke u përshëndetur nga avokati i Diddy-t, Xavier Donaldson.

Megjithatë, West nuk u dërgua në sallën ku zhvillohet gjyqi, por në një sallë tjetër ku ndoqi procedurat së bashku me sigurimin e tij personal dhe qytetarë të tjerë.

Kjo paraqitje e West në gjykatë nuk është e papritur, pasi ai është shfaqur në New York me partneren e tij, Bianca Sensori, ditën e mëparshme. West ka deklaruar shpesh në të kaluarën se Diddy është një mentor për të dhe se vazhdon të kërkojë këshillat e tij.

Kohët e fundit, dyshja bashkëpunuan në këngën “Lonely Roads Still Go To Sunshine”, një bashkëpunim që ka shkaktuar tensione mes West dhe ish-gruas së tij, Kim Kardashian.