Kadri Veseli, Rexhep Selimi dhe Krasniqi nga Haga shprehin ngushëllime për vdekjen e Haxhi Thaçit: Nuk kurseu asgjë për jetën dhe lirinë

Lajme

17/03/2025 15:45

Kadri Veseli, Rexhep Selimi dhe Jakup Krasniqi nga Haga kanë shprehur ngushëllime për vdekjen e babait të ish presidentit Hashim Thaçi, Haxhi Thaçit.

Këtë telegram ngushëllimi e ka publikuar, Fondacioni “Përkrahje për Mbrojtjen Juridike të Hashim Thaçit” përmes një postimi në Facebook.

“Haxhi Thaçi, më shumë sesa vetëm prind i një prej themeluesve të UÇK-së dhe Shtetit të Kosovës, ishte edhe vetë bashkëpjesëmarrës i drejtpërdrejtë në të gjitha proceset e lëvizjes sonë kombëtare të shekullit të kaluar. Ndarja e tij nga kjo jetë është jo vetëm dhimbje, por edhe kujtim dhe mesazh se njerëzit jetojnë dhe nuk shuhen nga kjo botë nëse i kanë shërbyer më shumë sesa vetvetes – nëse i kanë shërbyer së mirës, vendit, nderit dhe kombit të tyre”, thuhet në telegramin e ngushëllimit dërguar nga krerët e UÇK-së që po gjykohen në Hagë.

Ata i kanë shprehur ngushëllimet më të sinqerta të gjithë miqve dhe dashamirësve të “Bacës Haxhi dhe familjes Thaçi”.

Mbrëmë është njoftuar se babai i ish-presidentit Hashim Thaçi, Haxhi Thaçi ka ndërruar jetë.

Ai po trajtohej prej disa muajsh në Qendrën Klinike Universitare të Kosovës, si shkak i gjendjes së rënduar shëndetësore.

Më 13 mars, ish-presidenti Thaçi arriti që të vizitojë babain e tij në QKUK pas kërkesave të shumta që kishte bërë e që ishin refuzuar vazhdimisht.

Ai qëndroi me të rreth 4 orë, por nën masa të rrepta sigurie. Pas kthimit të tij në Hagë, tri ditë më vonë babai veçse ndërroi jetë.

Haxhi Thaçi është përkujtuar nga shumë figura të rëndësishme shqiptare, si atdhedashës e kontributdhënës për liri e pavarësi të Kosovës.

Ai është përkujtuar si babai i ish-presidentit, por edhe si vetë kontribuues i lirisë së Kosovës përmes kontributit të dhënë në kuadër të UÇK-së.

Varrimi i Haxhi Thaçit do të bëhet nesër në ora 15:00, në varrezat e Burojës. Ceremonia e varrimit të tij është organizuar nga Komuna e Skenderajt dhe do të nis me një akademi përkujtimore nga ora 09:00./Lajmi.net/