E plotësuar (ora 19:58): Me një koncert në Skenderaj dhe me ndezjen e zjarrit në Prekaz është përmbyllur manifestimi triditësh “Epopeja e UÇK-së që ka filluar më 5 mars.

Në këtë ditë që është edhe dita e parë e manifestimit është mbajtur manifestimi qendror në kazermën “Adem Jashari” në Prishtinë me parakalimin e pjesëtarëve të FSK-së ndërsa më 6 mars janë bërë homazhe tek varrezat e dëshmorëve në Prekaz.

Nata e fundit është më 7 mars e cila edhe quhet “Nata e Zjarreve”.

Manifestimi Epopeja e UCK-së mbahet çdo vit që përkujton rënien e komandantit legjendar Adem Jashari dhe 50 familjarëve të tij më 5, 6 dhe 7 mars të vitit 1998.

Në atë kohë gjatë kësaj beteje është vrarë Adem Jashari, vëllai i tij Hamza, babai Shabani dhe anëtarët e tjerë të familjes në mesin e tyre edhe gra dhe fëmijë.

—————————————————————

Ata pas ndezjes së flakadanëve kanë nderuar të rënët e Jasharajve në Prekaz dhe tek kulla e komandantit legjendar Adem Jashari.

Ky manifestim është i treti me radhë dhe i fundit për nder të “Epopesë së UÇK-së” që fillon më 5 mars, pikërisht ditën kur më 5 mars 1998 ka filluar beteja mes Jasharëve dhe policisë dhe ushtrisë serbe.