Sulmuesi belg, Romelu Lukaku beson shumë në kualitetin e Adnan Januzajt. Madje, futbollisti i Chelseat mendon se ylli i ri i Manchester Unitedit mund të shkëlqejë në Botërorin që po mbahet në Brazil.

Belgjika do të luajë sot ndaj Algjerisë dhe 19 vjeçari pritet të përfundojë në bankinë. Mirëpo, ish bashkëlojtari i tij tek Anderlechti, beson në aftësitë e jashtëzakonshme të futbollistit nga Istogu.

“Është diçka shumë e madhe që e kemi Januzajn në skuadër me ne. Ne tashmë po mendojmë për gjeneratën e arshshme”, deklaroi fillimisht Lukaku.

“Adnani ka qenë i shkëlqyeshëm në Manchester United dhe, edhe në stërvitjet me ne në Brazil, i ka shfaqyr kualitetet e tij. Ai ka aftësi të jashtëzakonshme”, vazhdoi ai.

“Kam luajtur me të në akademinë e Anderlechtit, kështu që, e njoh shumë mirë. Shpresoj që ai të na japë diçka ndryshe. Ai ka shkëlqyer në Manchester United, kështu që, përse të mos e bëjë këtë edhe në Botëror?”, përfundoi Lukaku.