Federata Angleze e Futbollit (FA) po përballet me pyetje në lidhje me mbrojtjen e lojtareve të reja femra, pas akuzave tronditëse të bëra kundër një ish-trajneri të Aston Villas.

Jack Peel akuzohet për dërgimin e mesazheve të papërshtatshme për lojtaret e akademisë në disa klube të Superligës së Femrave, duke përfshirë një kërkesë për fotografi të zhveshura, gjatë kohës së tij si trajner i akademisë së femrave në klubin e Premier Ligës, transmeton lajmi.net.

Peel u pezullua nga Aston Villa në shtator të vitit 2021, pasi klubi mori një ankesë për sjelljen e tij të supozuar nga një anëtar i skuadrës së parë dhe kryen një hetim të brendshëm.

27-vjeçari dha dorëheqjen ditën që do të merrte pjesë në një seancë disiplinore zyrtare të Aston Villas, por i mohon me forcë akuzat, duke i përshkruar ato si “të neveritshme” dhe “të pavërteta”.

Aston Villa gjithashtu e raportoi rastin në FA, por organi drejtues është akuzuar se nuk e ka hetuar çështjen siç duhet. Përveç zbulimit të akuzave kundër Peel, “Sportsmail” ka zbuluar:

1.Peel nuk u intervistua zyrtarisht nga FA dhe vazhdoi të ishte i lidhur me një klub bazë në Tamworth, Dosthill Colts, për nëntë muaj pas largimit nga Villa.

2.Disa nga vajzat adoleshente që ai dyshohet se i dërgoi mesazhe dhe prindërit e tyre nuk u kontaktuan kurrë nga FA.

3.PFA nuk ishte në dijeni të rastit derisa u kontaktua nga “Sportsmail” dhe po kërkon urgjentisht një takim me FA për të përcaktuar se çfarë mbështetje u është ofruar lojtareve, nëse ka./Lajmi.net/