Isa Mustafa për vizitë zyrtare në Slloveni

Kryeministri i Kosovës, Isa Mustafa ka udhëtuar për një vizitë zyrtare në Republikën e Sllovenisë, me ftesë të kryeministrit slloven, Miro Cerar, ku do të pritet me nderimet më të larta shtetërore.

Lajme

11/05/2015 17:11

Përveç takimit me homologun Miro Cerar, kryeministri Mustafa do të takohet edhe me presidentin e Sllovenisë, Borut Pahor, kryetarin e Asamblesë Kombëtare, Millan Bërglez dhe kryetarin e Lubjanës, Zoran Jankoviq.

“Vizita e kryeministrit Mustafa në Slloveni dëshmon marrëdhëniet shumë të mira ndërmjet dy shteteve dhe pritet të ketë rezultate konkrete në fuqizimin e mëtutjeshëm të bashkëpunimit bilateral dhe shkëmbimeve ndërmjet dy vendeve”, thuhet në njoftimin e Kryeministrisë.

Në delegacion me kryeministrin janë edhe ministri i Punëve të Brendshme, Skender Hyseni dhe ai i Zhvillimit Ekonomik, Blerand Stavileci, ndërsa gjatë vizitës pritet të nënshkruhet një marrëveshje e bashkëpunimit policor ndërmjet dy ministrive.

Pjesë e kësaj vizite janë edhe udhëheqësit e odave ekonomike të dy vendeve, të cilët do të realizojnë agjendë të veçantë.

Gjatë qëndrimit në Lubjanë, kryeministri Mustafa po ashtu do të takohet edhe me bashkatdhetarët tanë në Slloveni.