Hysaj largohet nga Napoli, kërkohet nga top klubi i Ligës së Kampionëve

Bajerni është në kërkim të zëvendësuesit të Rafinha-s i cili pritet të lërë Mynihun pas disa viteve eksperiencë me bavarezët, dhe Hysaj konsiderohet si profili ideal për Bajernin.

Sport

17/04/2018 13:33

Në Angli kanë shprehur interesim për të gjigandët e futbollit britanik, emra sugjestionues si Manchester United, Arsenal apo Chelsea, por ndërkohë që nga Gjermania, Bajerni i Mynihut hedh një hap më konkret që tregon se interesimi për Elseid Hysajn është real.

Siç raporton faqja e specializuar italiane e merkatos “Tuttomercatoweb”, disa emisarë të kampionëve të freskët të Gjermanisë, këtë të dielë do të jenë në Juventus Stadium, për të ndjekur gjatë kryesfidës së javës në Itali, pikërisht Juventus- Napoli, nga pranë paraqitjen e mbrojtësit të Kombëtares Shqiptare.

Hysaj është një ndër pikat fikse të formacionit titullar të Napolit nën drejtimin e trajnerit Maurizio Sarri, dhe gjithmonë duke ju referuar mediave italiane, vlerësimi që i bën klubi i Aurelio De Laurentis, kartonit të 24 vjecarit nga Shkodra është 50 milionë euro, shifër kjo që konsiderohet disi e lartë nga klubi bavarez që shpreson të ketë një ulje për të përfituar shërbimet e Hysajt, transmeton “SuperSport”.

Bajerni është në kërkim të zëvendësuesit të Rafinha-s i cili pritet të lërë Mynihun pas disa viteve eksperiencë me bavarezët, dhe Hysaj konsiderohet si profili ideal për Bajernin.

Vlen këtu të kujtohet se interesimi i klubit që dominon futbollin gjerman për Hysajn nuk është i ri, ndërkohë që janarin e kaluar dhe Arsenali bëri lëvizjet e tij për të kuptuar nëse kishte mundësi për të hapur një tratativë me Napolin për mbrojtësin shqiptar.