Sipas një njoftimi të dërguar nga KFOR-i, ky projekt ka filluar vitin e kaluar, kur, pas një kërkese të bërë nga komandanti i KFOR it, gjenerali Salvatore Farina, sekretari hungarez i Mbrojtjes njoftoi edhe zyrtarisht qëllimin për të rritur praninë e trupave hungareze në Kosovë.

Hungaria ishte e pranishme në KFOR që nga fillimi i misionit në vitin 1999, si një nga vendet e para kontribuuese.

Në fillim të gushtit 2014, një njësi shtesë e manovrimit është vendosur në Kosovë: Kompania “DELTA”, e vendosur në Kampin Marechal de Lattre de TASSIGNY (në Novo Sellë) për të qenë nën komandën e Forward Command Post (FCP) të MNBG-E.

Ardhja e kompanisë hungareze kompenson reduktimin e pjesshëm të kontigjentit të Ukrainës, i cili do të zbatohet në fund të gushtit të këtij viti.

Ukraina do të mbajë praninë dhe kontributin e saj në KFOR me personel dhe mjete të specializuara, si Liria e Lëvizjes se Detashmentit (FOMD).

KFOR-i mirëpret trupat shtesë hungareze dhe shpreh mirënjohjen e saj për ushtarët e Kompanisë Manovruese të Ukrainës që veproi në Kosovë për të përmbushur misionin e NATO-s, ata kanë qenë një shembull i angazhimit të shquar dhe profesionalizmit ushtarak, thuhet në fund të komunikatës së KFOR-it.