Thierry Henry ka kritikuar sulmuesin e Real Madridit, Javier Hernandez për mënyrën si e festoi golin e fitores 1:0 ndaj Atletico Madridit.

Sulmuesi meksikan shënoi golin e vetëm të ndeshjes që e kualifikoi Realin në gjysmëfinale të Ligës së Kampionëve.

Por, Henry nuk e ka pëlqyer mënyrën e festimit të Hernandezit.

“Ka festuar sikurse të kishte fituar Kampionatin botëror”, deklaroi ish sulmuesi i Arsenalit e Barcelonës për “Sky Sports”.

“Ka luajtur kundër Atleticos, por tani nuk e di më se kur do të jetë sërish në fushë. Duhet t’i falënderohet Ronaldos, është ai që e ndryshoi rrjedhën e lojës. Goli, në realitet është i portugezit”, shtoi francezi duke aluduar në asistimin e Ronaldos që i mundësoi Hernandezit të shënonte gol.

“Ia pasoi topin vetëm për shkak se ishte në një pozitë më të mirë, më të lehtë për të shënuar. Hernandez u desh vetëm ta dërgonte brenda, por më pas u desh të kthehej për ta falënderuar Ronaldon”, u shpreh Henry.