Haxhiu reagon për sanksionet e SHBA-ve, ia përmend Haradinajt takimin me Radojiçiqin
Ministrja e Drejtësisë, Albulena Haxhiu, ka reaguar pasi SHBA-të i futën në listë të zezë krerët dhe anëtarët e bandave kriminale të veriut, përfshirë Zvonko Veselinoviqin dhe Milan Radojiçiqin.
Lajme
Haxhiu me anë të një postimi në Facebook ka thënë se sanksionet ndaj të lartëpërmendurve janë lajme të mira për Kosovën, shkruan lajmi.net.
Sipas saj, veriu i Kosovës është problematic jo për shkak të banorëve, por për shkak të grupeve kriminale, që sipas saj kanë pasur edhe mbështetjen e Prishtinës, duke iu referuar takimit të ish-kryeministrit Haradinaj me Milan Radojiçiq.
“Republika e Kosovës është e përcaktuar qartë në luftimin e kriminalitetit në çdo cep te saj, ndërkaq sanksionet e ShBA-ve mbi këto grupe kriminale tregojnë qartë adresat konkrete të vatrave të kriminalitetit që terrorizojnë qytetarët e asaj ane”, ka thënë Haxhiu.
Postimi i plotë:
Lajm jashtëzakonisht i mirë saksionimi i grupeve të krimit të organizuar në veri të udhëhequr nga Zvonko Veselinoviq dhe Milan Radojçiq.
E kemi theksuar që moti se veriu është i tillë jo për shkak të banorëve, por sepse është kontrolluar nga grupe të tilla kriminale që nuk kanë pasur vetëm mbështetjen e Beogradit, por edhe të Prishtinës.
Këto grupe kriminale, që hera herës priteshin edhe në zyret e institucioneve tona më te larta, fshihen prapa rezistencës që i bëjnë organeve të rendit për të sjell rend e ligj në atë pjesë të Republikës.
Republika e Kosovës është e përcaktuar qartë në luftimin e kriminalitetit në çdo cep te saj, ndërkaq sanksionet e ShBA-ve mbi këto grupe kriminale tregojnë qartë adresat konkrete të vatrave të kriminalitetit që terrorizojnë qytetarët e asaj ane. /Lajmi.net/