Me këtë rast, kryeministri Haradinaj gjatë homazheve në Gllogjan, tha se sot është një ditë vërtetë e veçantë, pasi jo vetëm që kujtohen një numër i madh i luftëtarëve të vrarë, por edhe misioni i tyre ka qenë i veçantë siç ka qenë bartja e të plagosurve, e bashkëluftëtarëve, një mision më i vështiri i mundshëm në luftë, por dhe më fisnik, thuhet në kumtesën kryeministrore.

“Batalioni Gardist në këtë rast i prirë nga gjeneral Avdyl Mushkola, me bashkëluftëtarë të gjallë si Shkumbini e plot të tjerë që i shohim këtu në këtë mision e kanë mbrojtur nderin e luftëtarit shqiptar, duke i mbrojtur të plagosurit, duke mos i lënë në duar të armikut pa rënë edhe vetë”, tha kryeministri Haradinaj, duke shtuar se kjo është njëra prej ngjarjeve më të dhimbshme të historisë tonë të luftës, por edhe njëkohësisht më krenare, transmeton lajmi.net.

Kryeministri Haradinaj më pas vazhdoi homazhet në Kodrali të Komunës së Deçanit, ku tha se nuk ka qenë lehtë atëherë por nuk është lehtë as tash duke theksuar se nuk bën të ndalemi, por duhet vazhduar të përçojmë porosinë në vend, Liri e Jetë për të gjithë.

Të pranishëm në homazhe ishin edhe ministri Pal Lekaj, kryetari Bashkim Ramosaj, kryetari i Suharekës, Bali Muharremaj, deputetë dhe përfaqësues të tjerë institucionalë te nivelit qendror e lokal. /Lajmi.net/