Sheshi “Zahir Pajaziti” po gumëzhinte nga të pranishmit që kishin ardhur në tendën e Panairit Dimëror, të premten paradite.

Në panairin e produkteve të llojllojshme vendore qytetarët po shijonin djathin, verërat e deri tek bakllavatë e çokollatat e shumta.

Panairi është mbështetur nga Zyra e Bashkimit Europian në Kosovë dhe Asociacioni i Agjencive të Bashkëpinimit Rajonal, prandaj përfaqësuesit të BE’së i ka takuar ta marrë dhuratën më të ëmbël.

Christof Stock, nga Zyra e Bashkimit Europian në Kosovë, ka cilësuar këtë panair si vazhdimësi e traditës të shumë vendeve të Europës.

“Ky panair u jep mundësi prodhuesve të shumtë nga mbarë Kosova që të paraqesin produktet e tyre. Rreth 50 biznese janë të përfaqësuara këtu dhe shumica e tyre janë të mbështetura nga programet e BE, e disa edhe nga Agjencitë Rajonale për Zhvillim”, ka thënë Stock.

Gjatë shëtitjes dhe shijeve të ndryshme që po provonte Stock në panair, hasi edhe emrin e tij në një ushqim.

Një shoqatë e grave kishte menduar që t’i bënte një surprizë atij, një bakllavë me kumbulla siç i shkon për qejfi. Pranë saj ishte e shkruar “Christof’s Bakllava”.

“Me këtë panair ne jemi duke e përcjellë një traditë që ekziston në shumë vende të Europës dhe që tani po fillon të aplikohet edhe në Kosovë”.

“Jam i sigurt që gjithsecili prej jush, do të gjejë të paktën një produkt të cilit nuk do të mund t’i rezistojë pa e blerë”, ka thënë Stock.