Bashkimi Evropian thotë se është i “zhgënjyer” me vendimin e Qeverisë së Kosovës.

“Është zhgënjyese të shohësh se nuk është ndjekur [këshilla e partnerëve ndërkombëtarë]”, thuhet në reagimin e BE-së.

Policia e Kosovës në veri, kryesisht e përbërë nga serbë lokalë, refuzon të shpërndajë fleta qortuese, që parashiheshin si hapi i parë në nisjen e zbatimit të planit për regjistrimin e automjeteve me targa RKS.

Suspendohet drejtori i policisë në veri, Nenad Gjuriq, pas refuzimit për zbatimin e vendimit të Qeverisë për targat.

Pjesëtarët serbë të Policisë së Kosovës, gjyqësorit dhe prokurorisë në veri japin dorëheqje pas vendimit të Listës Serbe për braktisjen e institucioneve të Republikës së Kosovës.

Shefi i diplomacisë së Bashkimit Evropian, Josep Borrell, u bën thirrje Prishtinës dhe Beogradit që të përmbahen nga çfarëdo veprimi i njëanshëm që mund të rrisë tensionet. Ai, gjithashtu, kërkon shtyrjen e afatit për riregjistrimin e makinave.

Presidentja e Kosovës, Vjosa Osmani, ka caktuar 18 dhjetorin, datë të mbajtjes së zgjedhjeve të jashtëzakonshme për kryetarë të komunave në veri.

Shtetet e Bashkuara vlerësojnë se nuk ka kushte për mbajtjen e zgjedhjeve në veri të Kosovës, pas sulmit në zyrat e KQZ-së në Mitrovicë të Veriut.

Shtyhen zgjedhjet e planifikuara për 18 dhjetor.

Ish-polici serb, Dejan Pantiq, arrestohet mbi dyshimet se kishte organizuar sulmin ndaj zyrtarëve të Komisionit Qendror të Zgjedhjeve në veri

I dërguari i posaçëm amerikan për Ballkanin Perëndimor, Gabriel Escobar, i kërkon Qeverisë së Kosovës ta lejojë kthimin e serbëve që dhanë dorëheqje nga institucionet.

Policia e Kosovës njofton për hapjen e konkursit për pranimin e policëve të rinj në Drejtorinë Rajonale e Mitrovicës-Veri.

Lista Serbe bën thirrje për bojkotim të procesit zgjedhor në komunat në veri të Kosovës.

Mbahen zgjedhjet lokale në veri, votojnë 3.47 për qind e banorëve.

Qeveria e Kosovës miraton vendimin për shpronësimin e tokave në komunat me shumicë serbe në veri të Kosovës, Leposaviq dhe Zubin Potok, me qëllim të “realizimit të projekteve infrastrukturore me interes publik”.

Zyra e BE-së në Kosovë bën thirrje që “të respektohen me përpikëri procedurat ligjore lidhur me shpronësimin e pronës së paluajtshme” dhe të sigurohet respektimi i të drejtave pronësore të pronarëve.

Ambasadori amerikan në Kosovë, Jeffrey Hovenier, thotë se autoritetet kosovare nuk duhet të përdoron forcë për të fituar qasje në ndërtesat komunale në veri të Kosovës.

Betohen kryetarët e rinj shqiptarë të katër komunave në veri.

Nën përcjellje policore, kryetarët e rinj hyjnë në ndërtesa komunale.

Sekretari amerikan i Shtetit, Antony Blinken, i dënon fuqishëm veprimet e Qeverisë së Kosovës. Ai tha se këto veprime janë marrë “në kundërshtim me këshillat e Shteteve të Bashkuara dhe partnerëve evropianë të Kosovës”.

Ndërkombëtarët kritikojnë Qeverinë e Kosovës për tensionim të situatës. QUINT-i dënon vendimin e Kosovës “për të hyrë me forcë në ndërtesat komunale në veri, pavarësisht thirrjeve tona për përmbajtje”.

Shefi i diplomacisë së Bashkimit Evropian, Josep Borrell, thotë se Kosova duhet të pezullojë operacionet e policisë rreth ndërtesave komunale në veri, si “hap i parë për uljen e tensioneve, ndërsa protestuesit e dhunshëm të ndalen”.

Ambasadori amerikan në Kosovë, Jeffrey Hovenier, tha se Qeveria e Kosovës nuk është koordinuar me SHBA-në për veprimet e ndërmarra në veri dhe, për këtë arsye, ka pësuar pasojën e parë: “stërvitjet Defender Europe 2023 kanë marrë fund për të”.

Franca dhe Gjermania kërkojnë zgjedhje të reja, thirrjes i bashkohen aleatët.

Bashkimi Evropian përgatit masa ndëshkuese ndaj Kosovës për mospërfillje të kërkesave për hapa të menjëhershëm për uljen e tensioneve në veri.

Qeveria e Kosovës shpalli organizata terroriste Mbrojtjen Civile dhe Brigadën e Veriut, të cilat veprojnë në veri të Kosovës – zonë e banuar me shumicë serbe. Dy organizatat numërojnë qindra pjesëtarë nga radhët e komunitetit serb.