Ushtria ka marrë kontrollin mbi radiot dhe stacionet televizive dhe ka bllokuar rrugët kryesore të kryeqytet, Bangkok, dhe qytete tjera të vendit, me qëllim siç thuhet, ruajtjen e rendit dhe ligjit.

Gjendja e jashtëzakonshme u vendos pas tensioneve të shkallëzuara midis qeverisë dhe opozitës që po zgjatin prej muajsh.

Analistët vlerësojnë se ky veprim mund të nxisë përkrahësit e qeverisë, veçanërisht nëse ndërhyrja e ushtrisë interpretohet si një grusht shteti. Kjo pasi në Tajlandë, ushtria ka realizuar të paktën 11 grushte shteti që nga fundi i monarkisë absolute në vitin 1932.

Ushtarët kanë rrethuar edhe ndërtesën kryesore qeveritare në Bangkok, e cili ka qenë “arenë” e demonstratave të dhunshme të opozitës, e cila po përpiqet që përvec kryeministres të largojë edhe administratën, që sipas saj është e korruptuar.

Ushtria ka urdhëruar edhe censurën nëpër media, në emër të “sigurisë kombëtare” dhe u ka bërë thirrje të dyja palëve, pozitës dhe opozitës, të mos marshojnë në asnjë rrugë, përndryshe do të ballafaqohen me shkeljen e Ligjit për gjendje të jashtëzakonshme, që parasheh dënime të rënda.

Shefi i Ushtrisë, Prayuth Chan, ka bërë të ditur se Ligji ushtarak ishte imponuar nga situata e krijuar, dhe se është në fuqi për të rivendosur paqen dhe rendin për njerëzit nga të gjitha anët.

Tajlandë është përballur me një luftë për pushtet që kur se vëllai i ish-kryeministres Yingluck, Thaksin Shinawatra, u largua nga pozita e kryeministrit pas një grusht shteti të bërë nga ushtria në vitin 2006.

Në fillim të muajit maj, Gjykata Kushtetuese në Tajlandë e ka shkarkuar shefen e qeverisë, Yingluck Shinawatra dhe nëntë anëtarë të kabinetit të saj, pasi që ka gjetur se kryeministrja ka shkelur pushtetin me veprimet e saj për ta transferuar shefin e Këshillit të Sigurimit Kombëtar në një post tjetër, në vitin 2011.

Yingluck ka thënë se ajo dhe as partia e saj nuk kanë pasur përfitime personale nga ky transferim, porse do të respektojë vendimin e Gjykatës Kushtetuese, pasi sic ka thënë ajo, ato janë të detyrueshme.

Japoni nga ana tjetër, si investitori më i madh në Tajlandë, ka shprehur shqetësime për situatën e krijuar politike dhe u ka bërë thirrje të gjitha palëve që të ushtrojnë vetëpërmbajtje pa përdorur dhunë.