Të Infektuar: 14119

Të Shëruar: 10546

Të Vdekur: 563

Gjilani në pritje edhe të 91 mostrave të reja me koronavirus

17:41 | 10 Gusht 2020

Komiteti i Emergjencave në Gjilan, në mbledhjen e radhës të mbajtur sot, ka vlerësuar gjendjen dhe ka rekomanduar respektimin e masave mbrojtëse, në mënyrë që rastet të jenë gjithnjë në rënie.

Selami Xhemajli, drejtor i Shëndetësisë dhe Mirëqenies Sociale, ka thënë se nga rezultatet e fundit, janë konfirmuar 17 raste pozitive me Covid-19.

“Nga numri i përgjithshëm i rasteve prej 605 sa janë në totalin e përballjes me gjithë pandeminë, të shëruar janë 403 raste, të vdekur fatkeqësisht janë 25 raste dhe në 177 raste janë aktive. Përkujdesja institucionale është në baza ditore me asistencë shëndetësore dhe me medikamente. Kemi, gjithashtu, edhe 91 mostra që janë në përpunim dhe rezultatet e tyre do të publikohen në ditët në vijim. Në Spitalin Regjional janë duke u trajtuar 31 pacientë të konfirmuar me Covid-19”, ka njoftuar Xhemajli, në konferencën për media.

Më tej, ai ka konfirmuar se për shkak të rezultimit me Covid-19 të disa zyrtarëve në Drejtorinë e Financave, është mbyllur ky shërbim deri në një vendim tjetër, sepse zyrtarët e këtij resori janë në vetizolim.

Komiteti ka apeluar që personat e konfirmuar me Covid-19 dhe ata që kanë pasur kontakt me të infektuarit, të qëndrojnë në vetizolim në afatin e rekomanduar nga institucionet shëndetësore, po ashtu sektori privat dhe gastronomia në përgjithësi të respektojë vendimet e shtetit për respektim të distancës dhe ofrimin e shërbimit me masat mbrojtëse. /Lajmi.net/