UEFA ka vendosur që ndeshja mes Galatasarayt dhe Juventusit të vazhdojë sot nga ora 14:00.

Ballafaqimi vendimtar që do të përcaktonte skuadrën e dytë që kualifikohet për në fazën eliminatore të Ligës së Kampionëve nga Grupi B, u ndërpre pas 31 minutash lojë në Stamboll, për shkak të reshjeve të mëdha të borës që e bënë të pamundur vazhdimin e takimit.

Mirëpo, pas shumë konsultimeve, UEFA ka njoftuar se ballafaqimi do të vazhdojë të mërkurën. Pas 31 minutash lojë, rezultati ishte i barabartë 0:0.

Galatasarayt i nevojitet vetëm fitore që të sigurojë kualifikimin, kurse Juventusit i mjafton edhe një pikë në mënyrë që t’i bashkohet Real Madridit – fitues i Grupit B – në fazën eliminatore të garës elite të klubeve evropiane.