Pas intervistës së babait të talentit të Manchester United, Adnan Januzajt, Abedinit, i cili akuzoi rëndë Federatën Shqiptare të Futbollit (FSHF) për mungesën e interesimit për mesfushorin e talentuar, ka ardhur reagimi i kësaj të fundit.

FSHF ka publikuar një komunikatë ku ka pranuar ‘fajin’, dhe shprehu gatishmëri të plotësojë çfarëdo kushti për inkuadrimin e Januzajt në ekipin kuqezi.

“Ashtu si në çdo rast, ndjeshmëria e Federatës Shqiptare te Futbollit rreth talentëve shqiptarë të këtij sporti magjik, ka qenë prezent edhe për çështjen e Adnan Januzaj. Qëndrimi publik për futbollistin shqiptar të Manchester United është endur mes kërkesave e ofertave, pranimeve dhe refuzimeve, diku mediale, rrallë herë konkrete e më ne fund gati të paqarta. Në mes të dy “brigjeve” , talentit Januzaj dhe atyre që e kërkojnë atë, janë vendosur barriera psikologjike me bazë nacionaliste, origjinë dhe të kaluarës së tij familjare”, shkruan në komunikatën e FSHF-së.

“Pikërisht këtu kanë nisur edhe diskutimet e mëdha me prova të vogla, të cilat ndonjëherë kapërcejnë edhe kufijtë e etikës së qytetarisë së vërtetë. Federata Shqiptare e Futbollit nuk dëshiron te merret me shpjegime anësore te heshtjes, sepse qartazi ato kanë shkaktuar dhe vazhdojnë të krijojnë keqkuptime që nuk i shërbejnë qëllimit. Ne jemi të gatshëm të pranojmë gjithçka, vetëm që  i talentuari Januzaj të bëhet pjesë e Kombëtares tonë dhe të kontribuoj në të ardhmen për futbollin shqiptar. Federata Shqiptare e Futbollit deklaron zyrtarisht, se siç është vepruar edhe më parë me futbollistët që sot janë pjesë e kombëtares do të vijoj punën pa asnjë ndikim, mëdyshje apo hezitim që Adnan Januzaj të vishet kuqezi për të nderuar veten, familjen dhe flamurin e të parëve të tij”, thuhet në vazhdim.

Abedin Jauzaj deklaroi se FSHF ia ka mbyllur vetes dyert me mos interesimin për Adnanin dhe vuri në dyshim serioz inkuadrimin e tij në Kombëtaren e Shqipërisë.