Hashim Thaçi përmendi të gjitha komunat dhe kandidatët e PDK’së për kryetarë të tyre ku është i bindur se partia e tij, PDK, do t’i fitojë zgjedhjet  lokale të 3 nëntorit.

Kur erdhi radha te Malisheva, prej nga edhe po fliste, Kryetari i PDK’së e cilësoi fitoren në këtë komunë si “Flakadan për Kosovën”.

Aq i sigurt u ndie se do ta fitojë Malishevën me kandidaturën e Isni Kilajt saqë parashikoi fitore që në raundin e parë për të.

“Flakadani i fitores së PDK fillon në Malishevë, sepse PDK është e juaja, edhe ju jeni të Malishevës. Fitorja është e juaja. Urime!”, ka thënë Thaçi në tubimin që u mbajt në Sallën e Sporteve të këtij qyteti.

“Keni bërë shumë për Kosovën dhe shteti i Kosovës do të vazhdojë të bëjë edhe më tepër për ju. Ju ftoj të vazhdoni me fushatën e qetë”.

“Edhe në Malishevë kam besim të plotë që do të fitojmë që në raundin e parë”.

“Ju keni guxuar për të luftuar dhe për të fituar në luftë dhe keni fituar. Sot guxoni të fitoni edhe në paqe”.

Thaçi e ka cilësuar Isni Kilajn si “njeriu i ndryshimeve në Malishevë”, ndërsa ka premtuar se nën qeverisjen e tij, Malisheva do të përfitojë investime në vlerë prej 75 milionë eurosh në periudhën e ardhshme katërvjeçare.

Ndërsa Isni Kilaj tha se qeverisja e Komunës nga PDK e ka larguar atë nga skamja dhe e ka futur në rrugën e zhvillimit.

Ai e quajti Hashim Thaçin si “Njeriu i Shekullit”.

“Atmosfera këtu po tregon se jemi në rrugë të mbarë, jemi me PDK’në. Mbështetja e juaj është e fuqishme dhe mbështetja juaj nuk është zbehur, por është shtuar”.

“Qeveria e mirë vazhdon për Malishevën Europiane. Urime fitorja qytetarë të Malishevës!”, ka thënë Kilaj.