Është duke u ndërtuar një objekt, i cili planifikohet të jetë Fakulteti i Sigurisë Publike, në Vushtrri. Në rrugën “Gjergj Kastrioti – Skënderbe”, përbrenda ambienteve të Qendrës së Kosovës për Siguri Publike, janë duke u realizuar punimet në ndërtimin e këtij objekti, që komunën e Vushtrrisë e bëjnë për herë të parë në histori me një fakultet. 

Zëdhënësi i komunës së Vushtrrisë, Bahri Bivolaku, tha se pritet që ky objekt do të jetë i gatshëm për t’i pranuar studentet brenda këtij viti akademik. 

“Ndërtimi i këtij objekti të Fakultetit të Sigurisë Publike, e në afri edhe i objektit të degës së Gjykatës Themelore të Mitrovicës, në Vushtrri, si dhe investimet që është duke i kryer komuna e Vushtrrisë, duke rregulluar dhe zgjeruar rrugët dhe trotuaret si dhe rrjetin nëntokësor të kanalizimit e të ujësjellësit, e bëjnë këtë pjesë të qytetit të Vushtrrisë më të zhvilluar”, tha Bivolaku. (Zëri)