Në draftin që kjo gazetë e ka parë, thuhet se detyrat e Forcave të Armatosura të Kosovës (FAK) janë mbrojtja e sovranitetit, integritetit territorial, qytetarëve, pasuria dhe interesat e Republikës së Kosovës.

Këto Forca, thuhet tutje, do të kontribuojnë në ndërtimin dhe ruajtjen e paqes rajonale, evropiane dhe stabilitetit global, transmeton Indeksonline.

Në nenin që flet për organizimin, thuhet se këto forca profesionale do ta ruajnë diversitetin etnik të popullsisë në Kosovë, derisa rekrutimin do të ndodhë në mesin e shtetasve të Republikës së Kosovës.

Sipas draftit, plan i forcave të armatosura është që të përbëhen nga një komponentë aktive me 5,000 pjesëtarë dhe një komponentë rezerve prej më shumë se 3,000 pjesëtarësh, shkruan tutje kjo gazetë.

Detyrat e FAK-ut janë edhe pjesëmarrja në operacione mbështetëse për reagim në kriza dhe në vendosjen e paqes, ndihma për popullatën civile dhe autoritetet civile në rast të fatkeqësive natyrore dhe situata tjera të jashtëzakonshme.

Ministria e Forcës së Sigurisë së Kosovës e ka përfunduar draftin për “Forcat e Armatosura të Kosovës”, i cili javën e ardhshme do të prezantohet para qeverisë në Prishtinë.

Për t’u krijuar është i nevojshëm ndryshimi i Kushtetutës së Kosovës, kurese për këtë duhet të votojnë edhe deputetë serbë.