Aaron Ramsey pranoi se bëri një gabim të rëndë në humbjen e Arsenalit nga Borussia Dortmund 2-1 të martën mbrëma në kuadër të Grupit F në Ligën e Kampionëve.

Ylli uellsian e humbi topin afër portës së skuadrës së tij dhe kjo bëri që Dortmund të kalojë në epërsi pas golit nga Henrikh Mkhitaryan.

Dhe, pavarësisht se mendon se Arsenali e meritoi së paku një barazim, Ramsey pranoi se ndihet i dëshpëruar që gabimi i tij u përcoll me golin e parë të Dortmundit.

“Një barazim do të ishte rezultat i drejtë për mënyrën si luajtëm në pjesën e dytë”, deklaroi Ramsey për uebfaqen zyrtare të Arsenalit.

“Ndjeja se e kishim kontrollin e ndeshjes por u ndalëm për vetëm 30 sekonda, aq mjaftoi që ata të realizonin golin e epërsisë. Isha i dëshpëruar për mënyrën si realizuan, e humba topin dhe kjo më bëri të ndihem keq”, u shpreh ai.

“Ishim pak sa të ngadalshëm por mendoja se pas gjysmë ore lojë ne hymë në ndeshje, realizuam golin e barazimit dhe kishim besim për pjesën e dytë”, përfundoi Ramsey.