RTV 21 ka sjellë dëshminë e trishtueshme të një gruaje shqiptare të dhunuar nga forcat serbe gjatë luftës.

Shkrimtari i madh shqiptar Ismail Kadare e pati quajtur të turpshme heshtjen ndaj përdhunimit të grave gjatë luftës në Kosovë. Pati nënvizuar se politikanë apo akademikë, për turpin tonë të pafund, e kanë mendjen kundër njëri-tjetrit.

“Jo veç me u dënu, por e meritojnë me vdekje atë dënim. Çka kam hjek, çka kam përjetu, çka me kanë ba mu, aman jarabi”, rrëfen gruaja që tetë muaj u dhunua gjatë luftës në Kosovë nga paramilitarët serbë.

Duke kërkuar drejtësi, ajo rrëfeu historinë dhe vuajtjet e pa treguara më parë në medie.

Me dhimbje thotë se nuk e di as vetë se sa herë është dhunuar. Vuan nga plagët në trup të shkaktuara nga paramilitarët serbë.

“Më kanë dhunuar, më kanë rrahur mua dhe fëmijët, vjehrrën dhe vjehrrin. Na kanë ba çmos zi e më zi. Sot jam krejt e lënduar. Krejt jam e shkyme, krejt barku kur të çohem në këmbë më duhet me i shti gishtat përfundi barkut për me i fut zorrët mrena. Kur të ulem nuk mundem me u çu në këmbë. Problem e kam. Nuk muj me fjet, sepse kam dhimbje”.

Kjo grua tregon për vuajtjet tetë mujore së bashku me fëmijët dhe anëtarët e tjerë të familjes.

Këto dëshmi thotë se i ka paraqitur në EULEX, duke ju treguar edhe emrat e dhunuesve, por shton se ky mision nuk bëri asgjë.

“Na kanë ardhur paramilitarët e kemi pas afër se nuk e di qysh ka ndodhë deri dy tri herë na kanë hy brenda. U kanë Bozha, u ardh me shokë të vet. U ardh me raki në dorë, nuk ka ditur çka po ban. I nijsha tu i thirr në emër tjerët, vishin grup. U kan Bobi, si u terrojke vike mrena. Vishin policia. U kanë Xhema, nuk na ka lan kund në këtë tokë”.

Derisa EULEX-i po dyshohet të jetë i përfshirë në disa skandale të korrupsionit, e tash së fundi dyshohet edhe për kurdisje të gjykimit në rastin ”Kleçka”, ky mision po vlerësohet se ka dështuar të gjejë dhunuesit e grave në Kosovë. Kemi provuar të marrim përgjigje nga zyrtarë të EULEX-it, por edhe pas tri ditësh pritjeje nuk i janë përgjigjur pyetjeve tona.

Të dështuara këtë mision dhe organet kosovare të drejtësisë, po i cilëson Fondi për të Drejtën Humanitare në Kosovë.

“ Nuk më mbetet tjetër të them vetëm se në fakt gjyqësori, kushdo qoftë, UNMIK-u, EULEX-i kanë dështuar të procedojnë lëndët për krime lufte që kanë të bëjnë me përdhunim seksual dhe kjo është shqetësuese”, thonë në Fondin për të Drejtën Humanitare.

Përfaqësues të organizatave të grave kërkojnë përkrahje më të madhe nga shteti për gratë e dhunuara gjatë luftës.

“Çdo ditë kemi raste, kontakte kemi shumë të mira me rastet. Jemi duke i verifiku edhe me EULEX-in. Janë duke i padit në EULEX, numri tyre është shumë i madh, por përkrahje kanë shumë pak nga shteti”.

Në Kosovë mendohet të jenë dhunuar rreth 20 mijë femra. Që nga paslufta janë ngritur katër aktakuza për dhunim seksual gjatë luftës. Por, të gjithë të akuzuarit janë shpallur të pafajshëm. Pas 16 vjetësh nga dhunimi, kjo grua kërkon drejtësi. (RTV21)