Ish-kreu i shërbimit gjerman të inteligjencës së jashtme, August Hanning, është arrestuar nën dyshimin për spiunazh dhe tradhti, në një prej çështjeve më të mëdha të sigurisë kombëtare në Gjermani në vitet e fundit. Hanning, 80 vjeç, ka pranuar përmes avokatit të tij se kishte në zotërim dokumente konfidenciale, por ka mohuar kategorikisht se ka paguar për marrjen e tyre apo se ua ka dorëzuar informacionet fuqive të huaja.

Avokati i tij, Leon Kruse, e cilësoi arrestimin si një “persekutim të padrejtë” dhe akuzat për tradhti si të pabazuara. Sipas tij, është e vërtetë që Hanning kishte dokumente konfidenciale në zotërim, por pretendimi se ai i kishte kaluar informacionet në dëm të Republikës Federale të Gjermanisë, aq më tepër kundrejt pagesës, është i pabazuar.

Prokurorët gjermanë dyshojnë se Hanning ka siguruar mijëra dokumente tepër sekrete nga një ish-bashkëpunëtor i tij në shërbimin gjerman të inteligjencës BND gjatë 16 viteve të fundit. Sipas hetuesve, në mesin e dokumenteve kishte materiale të përgatitura posaçërisht për kancelaren Angela Merkel dhe ministra të lartë gjermanë. Praktika dyshohet se ka vazhduar deri në fillim të këtij viti.

Hanning doli në pension në vitin 2009, pasi kishte drejtuar BND-në dhe kishte shërbyer gjithashtu si nënsekretar në Ministrinë e Brendshme. Pas largimit nga shërbimi publik, ai punoi si konsulent privat për kompani, biznesmenë dhe individë të pasur. Prokurorët kanë deklaruar se Hanning ishte në kontakt aktiv me dy shërbime të huaja inteligjence. Megjithatë, autoritetet nuk kanë bërë të ditur se cilave shtete u përkisnin këto shërbime. Persona të njohur me hetimin kanë thënë se çështja nuk lidhet me Rusinë.

Në një prej rasteve që po hetohen, Hanning dyshohet se ka përdorur informacion të klasifikuar për të përgatitur një analizë për një “agjenci të huaj inteligjence” që e kishte angazhuar si konsulent. Dokumenti u gjet në pajisjet e tij personale, ndërsa prokurorët nuk kanë përcaktuar nëse analiza iu dërgua apo jo marrësit të synuar. Mediat gjermane kanë raportuar se një agjent i inteligjencës së Azerbajxhanit mund të ketë qenë marrësi i synuar i një raporti të përgatitur nga Hanning, i cili përmbante informacione të klasifikuara të qeverisë gjermane.

Autoritetet azerbajxhanase i kanë mohuar këto raportime, duke i cilësuar pretendimet që lidhin Bakunë me hetimin si të rreme dhe pjesë të një fushate shpifjesh.

Gjatë karrierës së tij, Hanning ka qenë një figurë e debatueshme. Në periudhën kur drejtonte BND-në, nga viti 1998 deri në vitin 2005, agjencia u përfshi në një skandal pas monitorimit të gazetarëve investigativë gjermanë që kishin kritikuar aktivitetin e saj. Çështja u bë objekt i një hetimi parlamentar dhe BND u detyrua të kërkonte falje. Hetimi që çoi në zbulimin e dokumenteve sekrete nisi në Hamburg, në kuadër të një çështjeje që lidhet me Christina Block, trashëgimtaren e rrjetit të restoranteve Block House.

Prokurorët pretendojnë se Hanning e ndihmoi Block të lidhej me një kompani private izraelite të inteligjencës, e cila dyshohet se ishte përfshirë në rrëmbimin e dy fëmijëve të saj në Danimarkë, në natën e Vitit të Ri 2023.

Sipas autoriteteve, operacioni, i koduar “Operacioni i Artë”, u krye nga ish-agjentë të inteligjencës izraelite. Hanning dyshohet se është paguar 100 mijë euro për shërbimet e tij në lidhje me këtë çështje. Policia gjermane bastisi shtëpinë e Hanning në shtator të vitit të kaluar dhe i përgjonte telefonin me urdhër të prokurorëve të Hamburgut. Gjatë hetimit u zbuluan dokumente sekrete dhe të kohëve të fundit të BND-së.

Materialet iu kaluan më pas Prokurorisë Federale, e cila në maj të këtij viti nisi hetim ndaj Hanning për spiunazh dhe tradhti. Çështja ka hapur një debat të gjerë politik në Gjermani për aktivitetet e ish-agjentëve të inteligjencës pas largimit nga shërbimi publik. Në parlament po diskutohen gjithashtu ndryshime të kuadrit ligjor që rregullon veprimtarinë e BND-së, ndërsa anëtarë të komisionit parlamentar që mbikëqyr shërbimin gjerman të inteligjencës kanë kërkuar rregulla më të forta për punën private të ish-zyrtarëve të shërbimeve sekrete.