Diego Lopez ka mundësi të largohet nga Real Madridi në fund të sezonit. Këtë javë, tifozët madrilenë e kontestuan atë, duke e preferuar portierin Iker Casillas në portë edhe në ndeshjen e La Ligas, krahas Ligës së Kampionëve dhe Copa del Rey.

Madje, ish portieri i Sevillas u vërshëllye në ndeshje me Rayo Vallecanon. Një pjesë e madhe e tifozëve janë në anën e legjendës Casillas, e për këtë, Lopez e ka ndërmend të largohet pas një viti e gjysmë, përkundër besimit të madh që e ka trajneri Carlo Ancelotti në të.

Lopez e ka lënë në bankinë Casillasin, që prej transferimit të tij në Santiago Bernabeu, në janarin e vitit 2013.

Trajneri Jose Mourinho fillimisht, e më pas edhe Ancelotti, i besojnë më shumë veteranit Lopez, në krahasim me Casillas, të cilin megjithatë së fundmi e duan më shumë tifozët.