Të Infektuar: 41.299

Të Shëruar: 26.453

Të Vdekur: 1.062

Dëshmi shkencore në rritje se ajri i ndotur mund ta përkeqësojë koronavirusin

18:35 | 13 Korrik 2020

Foto ilustrim: Ajri i ndotur në Prishtinë

Ekzistojnë prova të konsiderueshme që ndotja e ajrit rrit ndjeshëm numrin e të infektuarve me koronavirus, pacientëve të pranuar në spital dhe vdekjeve, sipas analizave më të hollësishme dhe gjithëpërfshirëse në dispozicion.

Një hulumtim i ri tregon se një rritje e vogël, me njësi të ekspozimit afatgjatë të njerëzve ndaj grimcave të ajrit të ndotur, ngre numrin e infeksioneve dhe pacientëve në spital në rreth 10% dhe atë të vdekjeve në 15%. Studimi mori në konsideratë më shumë se 20 faktorë të tjerë, përfshirë dendësinë mesatare të popullsisë, moshën, madhësinë e familjes, profesionin dhe mbipeshën, shkruan The Guardian, transmeton lajmi.net.

Studime shtesë Evropa, SHBA-të dhe Kina po tregojnë se ajri i ndotur po e përkeqëson gjendjen me Covid-19.

Shkencëtarët thonë se ende nuk kanë arritur të provojnë ndonjë lidhje shkakësore midis ndotjes së ajrit dhe ndikimit negativ në koronavirus. Provat përfundimtare do të vijnë vetëm pas posedimit të dhënave të shumta për njerëzit individualë, të cilat nuk janë ende të disponueshme, sesa të dhënat mesatare për rajonet siç përdoren në analizë, sipas mediumit britanik.

Por shkencëtarët thanë se është e rëndësishme që të bëhet hulumtimi më i mirë të mundshëm, pasi të kuptuarit e lidhjes mund të jetë e rëndësishme në trajtimin e shpërthimeve të mëtejshme të Covid-19 dhe mund të sinjalizojë se ku valët pasuese do të godasin më rëndë.

Shumë shkencëtarë kanë rënë dakord se ndotja e ajrit ka të ngjarë të shtojë numrin dhe ashpërsinë e simptomave të Covid-19, pasi që ajri i ndotur ndez mushkëritë dhe shkakton sëmundje të frymëmarrjes dhe zemrës që i bëjnë njerëzit më fragjil.

“Ajo që nxorëm nga studim krijoi me të vërtetë një marrëdhënie të fortë”, tha Prof Matthew Cole, i cili kreu studimin me kolegët e tij Ceren Ozgen dhe Eric Strobl në Universitetin e Birmingham, në Mbretërinë e Bashkuar. Për dallim nga shumica e studimeve deri më tani, punimi është rishikuar nga shkencëtarë të pavarur dhe është pranuar për botim në revistën ‘Environmental and Resource Economics’.

Studimi më i spikatur i mëparshëm u krye nga studiues të Universitetit të Harvardit. Ata zbuluan një rritje prej 8% të vdekjeve të koronavirusit pas një rritjeje të vetme të njësive në ndotjen e grimcave të imëta të ajrit. /Lajmi.net/