Dënohen 10 veta në Gjilan për terrorizëm dhe organizim ose pjesëmarrje në një grup terrorist.

Një trup gjykues i përbërë nga gjyqtarët ndërkombëtarë dhe vendës, në Gjykatën Themelore në Gjilan, ka shqiptuar afro 60 vjet burgim për këta dhjetë të dënuar, njofton EULEX.

Të dënuarit janë: Valon Jashari, Skënder Jashari, Gazmend Lakna, Gazmend Xhemshiri, Qëndrim Rexhaj, Muhamed Aliu, Skender Selmani, Enver Musolli, Abdullah Zogaj dhe Jeton Shabani.

Në njoftimin e EULEX’it thuhet se trupi gjykues ka konstatuar se të pandehurit e kishin themeluar një grup të organizuar, i cili e kishte kryer një sulm të armatosur ndaj postbllokut serb afër Bujanovcit, në vitin 2012.

Dënimi i këtyre personave bazohet në akuzën se grupi kishte për qëllim nxitjen e një konflikti në Luginën e Preshevës, për të shtyre bashkësinë ndërkombëtare që të intervenojë.

Ky grup prej 10 vetave janë dënuar me burg në kohëzgjatje nga 2 deri në 9 vjet burg.