Juan Guillermo Cuadrado ka konfirmuar zyrtarisht se ku do të luajë në sezonin e ri.

Ylli kolumbian, i shumëkërkuar gjatë këtij afati kalimtar të verës nga gjigantë të futbollit evropian si Manchester United e Barcelona, ka njoftuar se do të mbetet te Fiorentina.

“Mbetem me entuziazëm dhe me bindje se mund ta udhëheq Fiorentinën gjithnjë e më lart, së bashku me bashkëlojtarët e mi. Forza Viola”, ka shkruar Cuadrado në profilin e tij në Instagram. 

Trajneri i Fiorentinës, Vincenzo Montella ka insistuar se Juan Cuadrado nuk do të largohet nga klubi, gjatë këtij afati kalimtar të verës.

Ylli kolumbian është kërkuar së fundmi nga Barcelona dhe Manchester United. Mirëpo, Montella ka theksuar se ai asnjëherë nuk e konsideroi mundësinë e shitjes së Cuadrados dhe pret që futbollisti të jetë në dispozicion të tij edhe për sezonin e ri.

“Asnjëherë nuk kam menduar ta shes Cuadradon. Për mua është dhe do të jetë ende futbollist i Fiorentinës”, deklaroi Montella për të përditshmen sportive italiane “Corriere dello Sport”.

“Nëse e shesim tani, klui do të kishte arsyetim të përkryer për të mos investuar në zëvendësues po aq kualitativ. Ai mund të luajë në role të ndryshme edhe si mbrojtës i djathtë. E shoh mirë edhe prapa sulmuesve”, u shpreh Montella.