Përfaqësuesi i Lartë i BE-së, Josep Borrell, është takuar të mërkurën në Bruksel me ministrin e Punëve të Jashtme të Serbisë, Marko Gjuriq.

Gjatë takimit, siç ka njoftuar BE-ja, Borrell ka theksuar rëndësinë e përafrimit të Serbisë me politikat dhe vendimet e BE-së, veçanërisht në kontekstin e agresionit rus ndaj Ukrainës.

Lidhur me dialogun Kosovë – Serbi, Borrell ka ritheksuar pritshmërinë e BE-së që të dyja palët të angazhohen në dialog në mirëbesim dhe në frymën e kompromisit për arritjen e një marrëveshjeje gjithëpërfshirëse dhe ligjërisht të detyrueshme.

“Prioriteti kryesor është të ecim përpara me zbatimin e Marrëveshjes për rrugën drejt normalizimit të marrëdhënieve. Rruga evropiane e Kosovës dhe Serbisë kalon përmes dialogut”, ka theksuar Borrell.