Kryetari i Komunës së Mitrovicës, Agim Bahtiri, u  betuar sot solemnisht para këshilltarëve të Kuvendit Komunal.

Seancën e betimit e udhëhoqi asamblisti më i vjetër Riza Haziri.

Bahtiri u zotua se do të mbajë premtimet e bëra gjatë fushatës elektorale, madje ai tha se do t’i tejkalojë ato.

Ai premtoi se Mitrovicës do t’ia kthejë “namin” e saj të dikurshëm.

“Betohem para Zotit dhe juve, se do të qeverisim gjatë katër viteve të ardhme me tërë kapacitetin njerëzor e intelektual… duke punuar në të mirë të të gjithë qytetarëve pa dallim”.

“Premtimet e dhëna gjatë fushatës, jo vetëm se do t’i përmbushi, por edhe do t’i tejkalojë ato”.

“Mitrovicës do t’ia kthejmë namin që kishte dikur”.

Në këtë ceremoni nuk mori pjesë Kryetari i deritanishëm i kësaj komune, Avni Kastrati. Por, pas ceremonisë së betimit, Kryetari në largim e priti në zyrën e tij Kryetarin e ri, të cilit i uroi punë të mbarë.

Kastrati tha se shpreson që Kryetari Agim Bahtiri do t’i mbajë premtimet e bëra gjatë fushatës, sidomos premtimin për punësimin e 15 mijë njerëzve.

Ai tha se PDK do të jetë opozitë konstruktive dhe do të punojë në të mirë të qytetarëve.