Lazio barazoi 0:0 në udhëtim te Bologna, në kuadër të xhiros së 19’të në Serie A.

Portieri kosovar, Etrit Berisha doli i pamposhtur edhe në paraqitjen e tij të dytë të njëpasnjëshme si titullar elitën e futbollit italian.

Reprezentuesi shqiptar sërish zuri vend në formacionin bazë të trajnerit Edy Reja dhe edhe njëherë tjetër e shpagoi besimin e strategut italian.

Berisha – me vetëm dy paraqitje këtë edicion në Serie A – ka arritur të bëjë atë që nuk e ka realizuar portieri i parë Federico Marchetti.

24-vjeçari e ruajti të pamposhtur portën e Lazios për ndeshjen e dytë të njëpasnjëshme, hera e parë deri më tani gjatë këtij sezoni. Lazio ka 24 pikë dhe gjendet në pozitën e nëntë.