Bayerni e mbyll me fitore
Bayern Munich e përfundoi edicionin e sivjetmë të Bundesligës me fitore 1:0 ndaj Stuttgartit në Allianz Arena. Fitore shënuan edhe Dortmund, Leverkusen e Schalke.
Sport
Bayern Munich mposhti Stuttgartin 1:0 në ndeshjen e xhiros së fundit në Bundesligë.
Skuadra e Pep Guardiolës arriti të shënojë fitore para tifozëve të saj, por me shumë mund, ndonëse strategu katalan e nisi duelin me pothuajse komplet formacionin bazë, me përjashtim të mesfushorit Franck Ribery.
Sulmuesi Claudio Pizarro shënoi golin e fitores në minutën e fundit shtesë. Bayern e mbylli një sezon ku dominoi Bundesligën dhe fitoi titullin në kohë rekorde, në muajin mars.
Gjiganti bavarez e kreu stinorin me 90 pikë. Në ndeshjet tjera, Borussia Dortmund fitoi me rezultat të thellë 4:0 në udhëtim te Hertha Berlin, në ndeshjen ku Robert Lewandowski realizoi dy gola.
Bayer Leverkusen mundi Werderin me rezultat 2:1, kurse Schalke shkeli Nurnbergun duke e mposhtur 4:1.
Rezultatet:
Augsburg – Eintracht Frankfurt 2:1
Bayer Leverkusen – Werder Bremen 2:1
Bayern Munich – Stuttgart 1:0
Hannover – Freiburg 3:2
Hertha – Dortmund 0:4
Hoffenheim – Braunschweig 3:1
Mainz – Hamburg 3:2
Schalke – Nurnberg 4:1
Wolfsburg – Borussia M’gladbach 3:1