Barcelona ka arritur marrëveshje për vazhdimin e kontratës me mbrojtësin Marc Bartra.

Lajmi është bërë i ditur nga uebfaqja zyrtare e gjigantit katalan që ka njoftuar se 23-vjeçari ka vazhduar qëndrimin e tij në Camp Nou deri më 30 korrik të vitit 2017.

Me marrëveshjen e re, Bartra do të ketë dëmshpërblim prej 25 milionë eurosh.

Kontrata e re për Bartran, nuk ishte diçka e pritur për faktin se ai së fundmi ishte cak i shumë klubeve rivale evropiane, që u munduan të shfrytëzojnë pakënaqësinë e tij pas paraqitjeve të rralla për Barcelonën.

Mirëpo, vendimi i kapitenit Carles Puyol për t’u larguar nga klubi në fund të këtij sezoni, ka detyruar drejtuesit e klubit që të sigurojnë qëndrimin afatgjatë të Bartras duke i ofruar më tepër minuta lojë.